台語開講27~【凍結時間的黃金回憶】陶觀展評審推薦獎完結篇

弘鶯陶網路電台盧靖安 林聰明老師

[soundcloud url="http://api.soundcloud.com/tracks/309939183" params="auto_play=true" width="100%" height="128" iframe="true" /]

訪談大綱         評審推薦獎    「黃金」[ n̂g-kim ] ---「黃色蜂蜜親像黃金」。         評審推薦獎「人生終站系列」[ jîn-sing tsiong-tsām hē-lia̍t ]  ---「人生終站毋是結束」。         評審推薦獎   「颪」[ oroshi ] ---「下風甘是落山冷風」。         評審推薦獎　「九杯」[ káu-pue ]   --「酒杯驚喜莫貪酒杯」。           聰明老師：「時間就是黃金喔！這位作者用『黃金』佮『蜂蜜』的意象敆做伙，煞予我想著「愛因斯坦」的預言佮警告，講咱地球的蜜蜂若是消失去四年就好，咱人類就愛綴咧來滅亡，所以咱藏字頭是「黃色蜂蜜親像黃金」，就是講咱佮自然環境是共生體啦。」 雖然雙年展已經落展矣！無機會去看著黃金的人，咱就聽著黃金佮蜂蜜罔過癮啦！從評審推薦獎項作品延伸，這最後的四首由聰明老師作詞，讓靖安套「雙雁影」的調，唱出「黃金」、「人生終站系列」、「颪」、「九杯」，節目中聊了人生起伏與未知，重要的是要活出其價值，2017家語言發展法之研究與規劃公聽會已經在進行了，你覺得母語該如何復振呢？國內各語言的關係應該是怎麼樣的呢？期許大家一起來參加這幾場公聽會，說出你對國家語言政策的想望!           要聽所有搶救母語文化系列【台語開講】單元歡迎點選網址 http://goo.gl/xjSD3f         以下四首評審推薦獎! 「黃金」[ n̂g-kim ] 文：林聰明 黃金萬兩是蜂岫 [ n̂g-kim bān-niú sī phang-siū ] 色不異空悟春秋 [ sik-put-ī-khong ngōo-tshun-tshiu ] 蜂蟲傳承好跤手 [ phang-thâng thuân-sîng hó-kha-tshiú ] 蜜能助人無煩憂 [ bit-lîng-tsōo-lâng bô-huân-iu ] 親情五十佮朋友 [ tshin-tsiânn gōo-tsa̍p kah pîng-iú ] 像是聯結心中愁 [ tshiūnn-sī liân-kiat sim-tiong-tshiû ] 黃昏彩霞照米稻 [ hông-hun tshái-hâ tsiò-bí-tiū ] 金色光芒萬世留 [ kim-sik kong-bông bān-sè-liû ] 蜂岫 [ phang-siū ]：蜂巢。 蜂蟲 [ phang-thâng ]：蜂蛹。 親情 [ tshin-tsiânn ]：親戚。 黃金大概是人人攏會足愛，煞是人人攏提無啥會著的貴重物，爛塗大概是人人攏無啥會佮意，卻是人人攏提會著的普通物啦！毋過，若是提一粒種子予你使用，黃金就一點仔路用就無，顛倒是爛塗才會予種子來發牙發穎（puh-ínn），所以咱千萬毋通「看貓無點」喔！這位來自波蘭的瓷仔藝術家Stanislaw Brach，伊用幼瓷仔做出來歹去的蜂岫外形，然後才用真正的黃金來補、來修理這件瓷仔作品，若像佇咧講蜂岫代表咱大自然的環境，咱已經共破害甲誠悽慘矣！毋通閣戇囉！這擺我用藏頭字「黃色蜂蜜親像黃金」來佮作者呼應啦！ 若像猶會記得是「愛因斯坦」捌預言講，咱地球的蜜蜂若是消失去四年就好，咱人類就愛綴咧來滅亡啦！因為所有的花蕊煞攏無法度授粉，來結出好食的果子，你看這款代誌會有偌爾仔嚴重就好啦！愛會記得愛咱的環境，就是愛護咱家己的未來，尤其霾害（PM 2.5）遮爾仔普遍，咱時間真正無濟囉！就愛趕緊來覺醒啦！ 「人生終站系列」[ jîn-sing tsiong-tsām hē-lia̍t ] 文：林聰明 人人壽命無的確 [ lâng-lâng siū-miā bô-tik-khak ] 生死無常早慢縛 [ senn-sí bû-siông tsá-bān-pa̍k ] 終點若到倒坦覆 [ tsiong-tiám nā-kàu tó-thán-phak ] 站站攏是生死學 [ tsām-tsām lóng-sī sing-sú-ha̍k ] 毋通放放無智覺 [ m̄-thang hòng-hòng bô-tì-kak ] 是非成敗烏白觸 [ sī-hui sîng-pāi oo-pe̍h-tak ] 結果輪迴再次落 [ kiat-kó lûn-huê tsài-tshù-lak ] 束縛來生戇頭殼 [ sok-pa̍k-lâi-sing gōng-thâu-khak ] 無的確 [bô-tik-khak ] ：無法確定。 倒坦覆 [tó-thán-phak ] ：趴在那邊。 放放 [ hòng-hòng ] ：散慢、馬虎。草率不認真。戇頭殼 [ gōng-thâu-khak ] ：笨笨的頭腦。 幾仔個月前才看著「燒肉粽」的歌星郭金發先生佇臺仔頂唱歌，煞雄雄無張持佇臺仔頂來飄撇的離開世間，真正是世事無常局局新，欲按怎離開世間的方式，人人可能攏無仝款，我希望會當五福善終，嘛應該攏是咱眾人的向望啦！ 這位出生佇香港毋過蹛佇加拿大的瓷仔藝術家梁定國，伊用眾人容易理解的景來表達性命的無奈佮無常，警示咱毋通等啥物時陣才欲來創造有意義的代誌，若像咧共咱講「毋通顧趁錢，有孝愛及時」啦！若無等到無常先到，又閣帶業往生輪落六道業報，毋知影當時才會當真正了脫生死！這遍我用藏頭字「人生終站毋是結束」呼應。 「講」，真簡單，毋過欲真正佇生活中來修行是足無簡單喔！上無咱愛活佇當下，毋通醉生夢死無了時啦！人人攏會去拄著「魔考」，會當過關是無幾个人喔！希望結善緣、得善果遇善智識的開破，做後真正跳出三界輪迴的束縛才是上大的福報啦！ 「颪」[ oroshi ] 文：林聰明 下降沉底揣家己 [ hā-kàng tîm-té tshuē-ka-kī ] 風雨免驚心袂敧 [ hong-hōo bián-kiann sim-buē-khi ] 敢是下凡比志氣 [ kám-sī hā-huân pí-tsì-khì ] 是欲叫咱等何時 [ sī-beh kiò-lán tán-hô-sî ] 落葉滾絞輾輾去 [ lo̍h-hio̍h kún-ká liàn-liàn-khì ] 山勢不凡懸閣奇 [ suann-sè put-huân kuân-koh-kî ] 冷靜面對酸苦味 [ líng-tsīng bīn-tuì sng-khóo-bī ] 風風雨雨過百年 [ hong-hong ú-ú kuè-pah-nî ] 心袂敧 [ sim-buē-khi ] ：不會心緒不定。 滾絞 [ kún-ká ] ：翻轉滾動。 輾輾去 [ liàn-liàn-khì ] ：連續滾動。 懸 [ kuân ] ：高。 一字予我拍袂出來的日本特殊漢字「下／風」，只好用按呢生來表示，毋過顛倒是真好來望文生出意境啦！伊有一對平衡的翼股外形，予人一種強強欲輾落去的恐怖感，用足薄的白幼瓷來成型，感覺伊有一種隨時會當飄動的臨場感。 這位來自日本的瓷仔藝術家木野智史／Kino Satoshi，用轉踅的臨場感來表示，一種山頂風欲降落佇下面的假像，佇遐滾絞輾振動的意象，雖然是靜態，毋過，隨時動態的表示是足清楚啦！這擺我用的藏頭字「下風敢是落山冷風」來佮伊趣味的呼應。 咱人生嘛會有一股無明的冷風，隨時會搧對咱每一个人的身軀邊，等欲來考驗咱跤尾，敢徙有在- -無？你若是下心咧等待冷風到位，顛倒伊就是毋來，毋過，等到咱放棄去斟酌等待的時陣，冷風就會若（mooh）壁鬼咧，嘿嘿嘿！伊隨時就會現前喔！毋知影恁敢準備好- -未？ 「九杯」[ káu-pue ] 文：林聰明 九九人生行透透 [ kiú-kiú jîn-sing kiânn-thàu-thàu ] 杯杯攏是生死交 [ pue-pue lóng-sī sing-sú-kau ] 驚死毋通駛車走 [ kiann-sí m̄-thang sái-tshia-tsáu ] 喜酒好啉莫假 [ hí-tsiú hó-lim mài-ké-gâu ] 莫名其妙挵人吼 [ bo̍k-bîng kî-miāu lòng-lâng-háu ] 貪戀予焦逐杯剾 [ tham-luân hōo-ta ta̍k-pue-khau ] 酒若落喉人無效 [ tsiú-nā lo̍h-âu lâng-bô-hāu ] 杯仔毋通變酒甌 [ pue-á m̄-thang piàn-tsiú-au ] 好啉 [ hó-lim ]：好喝。 莫假 [ mài-ké-gâu ]：不要假裝很會。 挵人吼 [ long-lâng-háu ]：撞到人是會哭喔！ 予焦 [ hōo-ta ]：乾杯之意。 逐杯剾 [ ta̍k-pue-khau ]：每杯都乾杯到一滴不剩。 杯仔的功能是千變萬化，看咱按怎共伊來使用，毋過，爭議上大閣有問題的應該是用來啉酒，所產生社會問題上蓋困難解決，人非聖賢，尤其是三杯以上吞落腹，有法度自治的人毋是無，毋過，真正是足少啦！所以欲啉酒咱就毋通來駛車，欲駛車咱就千萬毋通來啉酒，這是為家己嘛為著眾生好啦！ 這位美國的瓷仔藝術家Jordan McDonald，無特別講伊的杯仔是啥物用途，毋過，拄好有九件的形式杯仔，我就用華語的「酒杯」、「九杯」來聯想啦！恁會使去現場看伊九 件作品的擺設，無講真特別的意涵，我只好共伊自由來聯想和恁分享。然後我用藏頭字「九杯驚喜莫貪酒杯」來佮伊聯想呼應。 希望咱佇享受各種形式杯仔的用途的時陣，攏會當避免不當的使用，既然是創作的藝術品，咱就加減家己反省來自我要求啦！人講：「酒醉心頭定、酒痟就無性命」，咱加加是會當來品酒，[tsi̍p]淡薄仔就真趣味，若是欲拚酒展氣魄，苦勸你就愛「兩角找五仙」--「角五」，也就是「覺悟」啦！因為後果真正是會不堪設想喔！  練習多次的您一定會跟靖安一樣，覺得愈讀愈有意思，愈聽愈好聽，愈唸愈有感情，加上靖安一個個問清楚字面的意思，還放上了老師的原文稿，相信有心如您，在欣賞之餘，也樂於將此網址轉貼分享，我們要呼籲正視母語教育，美好的聲音讓我們一起，讓我們每個月的第一個星期三早上10點弘鶯陶網路電台空中再相見! 要聽所有【台語開講】單元歡迎點選網址 http://goo.gl/xjSD3f 教育部閩南語常用詞辭典 http://twblg.dict.edu.tw/holodict_new/index.html 林聰明老師小檔案：台灣國立師範大學台灣文化以及語言文學研究所 現任:新北市鶯歌區昌福國小、建國國小的台語老師、固定於鶯歌陶瓷博物館每週三下午2點導覽志工 林聰明老師臉書 https://www.facebook.com/tshongbing.lim。

相關活動消息 1.2017國家語言發展法之研究與規劃公聽會 你覺得母語該如何復振呢？國內各語言的關係應該是怎麼樣的呢？大家一起來參加公聽會吧!大聲說出你對國家語言政策的想望! 2.【原味之美 -游善富陶瓷水墨個展】 展期:106/3/3-106/3/19 地點:中壢藝術館 第二展覽室 (桃園市中壢區中美路16號) 茶會３／５（日）下午２：３０ 誠挚邀請您～參觀指教 3.公告鶯歌區樂齡學習中心「106年度春季班」第一階段招生結果，有報名之學員，均「全部錄取」！如欲查詢者可點選下列連結「銀髮大學院網站」查詢！請所有正取學員務必於2/18（六）至2/23（四）至本校輔導室辦理驗證、報到及繳費以確認名額保留。第二階段現場報名時間為：3/1（三）至開課後一週內可現場報名（各班尚有餘額始開放現場報名，並由年長者遞補）報名專線:(02)2670-9228轉153。